LEGAZPI CITY – Dae nakayanan kan sarong babayi an kulog sa puso na namamatean makalihis na maaraman na bako na palan ini padaba kan nobyo kun kaya nagkaigwa ini nin kusog boot na kulugan an mismong sadiri.
Lugadan si Jessa Oliva na tubong Lagonoy, Camarines Sur asin presenteng nag-iistar sa banwaan kan Malilipot, Albay makalihis na tamaan nin bala sa toong parte kan saiyang tulak.
Sa inisyal na imbestigasyon kan mga otoridad, napag-araman na nasa laog nin kwarto kan sarong lodging house sa Purok 3, Brgy. Baranghawon, Tabaco City an magnobyo asin nag-oolay kan mabungkal an dapit sa pusog kan saindang relasyon.
Nagkaigwa suboot nin pag-iiwal an duwa makalihis na haputon ni Jessa an nobyong si Dennis Colada kun padaba pa sya kaini alagad imbes na magsimbag, na-silencio suboot an lalaki, rason ngani na mag-init an payo kan nobya.
Digdi na binulnot kan biktima an darang badil sa bag, itinutok sa tulak sagkod sa nadangog na sana an makusog na putok nin badil.
Huli sa pangyayari, nabigla an mga tawo sa lugar mantang idinalagan sa ospital an babayi.
Mientrastanto, narekober sa posisyon ni Colada an sachet nin pigtutubudang marijuana asin iba pang paraphernalia siring man an P20,0000 mantang nakua man gikan sa biktima an tulong sachet nin pigtutubudang shabu.
Sa ngunyan, nagpapadagos pa an imbestigasyon sa nasambitan na insidente.
