LEGAZPI CITY- Tinawan duon kan Department of Trade and Industry (DTI) Bicol an RA 10909 o an No Short Changing Act na nagbabawal sa pag-uli nin kulang kan mga tindahan o establisiemiento sa saindang mga parabakal.
Sigon sa tagapagtaram kan DTI Bicol na si Bem Verango, pwedesir na sangatan nin kaso an siisay man na negosyante na mabalgar sa nasambitan na ley.
Nagpatotoo na man suboot an Bangko Sentral ng Pilipinas (BSP) na bastante an saindang pigpo-produsir na coins o barya kun kaya dae pwedesir na magrason an mga tindahan na dae sinda nin pang-uli sa saindang mga customer.
Dugang pa ni Verango, talagang obligasyon kan mga ini na magkaigwa nin barya ngani na maulian nin tama an saindang mga parabakal.
Importante man giraray suboot an mga sentimos na pig-uuli sa mga mall.
Sa ibong na lado, liwat na nagpatanid an DTI Bicol sa mga lugar sa probinsya na nasa irarom kan State of Calamity na mahigot na pigpapa-utob an Automatic Price Control kun sain pigbabawalan an mga negosyante na maglangkaw kan presyo kan mga basic necessities o primer na pangangaipo puon pa kan bagyong Nina hasta sa presente.
