LEGAZPI CITY – Karsel an bagsak kan pigkokonsiderang provincial most wanted person kan Albay makalihis na madakop kan mga otoridad sa Gerona, Tarlac
Segun ki Albay Police Provincial Office Provincial Director Police Colonel Noel Nuñez sa intrevista kan Bombo Radyo Legazpi na binisto an suspetsado na si alyas “ dudoy”, construction worker asin residente kan Ligao City.
Nahahampang suboot an suspetsado sa patong-patong na kaso partikulamente an Statutory Rape na warang rekomendadong pyansa, Rape Through Sexual Assault na may pyansang nag-aabot sa P120,000, asin Lascivious Conduct na may rekomendadong piyansa na P200,000.
Ipigdoon niya na inarestar si dudoy sa bisa kan mandamiento de aresto asin sa pagtatarabangan kan saindang ofisina, Ligao City Police Station, Regional Intelligence Unit 5, Albay Provincial Intelligence Team, Philippine National Police-Intelligence Group, Regional Intelligence Unit 3, Tarlac Provincial Intelligence Team, Albay Provincial Intelligence Unit asin Criminal Investigation and Detection Group Albay.
Pigtaram pa kan opisyal na nai-byahe na pasiring sa provincia kan Albay an suspetsado asin nagtetenir na sa kustodiya kan Ligao City Police Station para sa magkakanigong disposisyon.
Nagpasalamat man si Nuñez sa magayon na koordinasyon kan komunidad sa mga kapulisan nganing masakote an mga indibidwal na haloy nang nagtatago sa ley asin matawan nin hustisya an mga biktima.
