LEGAZPI CITY – Mas naghihigot pa sa ngunyan sa pagbabantay kan National Meat Inspection Service sa mga produktong karne na naglalaog sa rehiyon.
Sa hampang iyan kan naglalakop na mga helang sa hayop siring kan Q fever, bird flu asin African Swine Fever.
Segun kay NMIS Bicol Director Dr. Alex Templonuevo, katabang an mga lokal na gobyerno, may mga inilatag na checkpoints an entry points kan rehiyon asin mga border kan kada provincia.
Saro-saro na pig-iinspeksyon an gabos na produktong karne na naglalaog kaiba na an karneng manok, orig asin iba pa.
Pig-aaram kung igwa nin magkakanigong mga dokumentos, kung nag-agi sa slaughter house asin kung salbado sa mga helang.
Segun kay Templonuevo, nakatutok man sa ngunyan an ahensya sa pagtraining nin mga local meat inspectors na pigkakaag sa kada barangay ngani na iyo na an magbantay sa mga checkpoints.
