LEGAZPI CITY — Dagos-dagos pa an pag-abot kan tabang hale sa manlaen-laen na ahensya para sa mga apektadong populasyon kan nag-aalburotong bulkang Mayon sa Albay na nag-aabot na ngonian sa P266.9 million sa kabilugan.
Napag-araman sa latest data kan Office of the Civil Defense (OCD) Bicol na nasa P218 million an ipinaabot na tabang kan mga ahensya kan gobierno partikular na an Department of Social Welfare and Development (DSWD); OCD; Office of the President (OP); Department of Health (DOH); Department of Environment asin Natural Reosurces (DENR); Department of Education (DepEd); Department of Labor and Employment (DOLE); Philippine Charity Sweepstakes Office (PCSO); International Organization for Migration (IOM); Philippine Red Cross siring man sa mga pagtaraid na provincial government asin non-government organizations.
Bako sana financial assistance an naibariwas kun saen kaibanan man an mga pagkaon asin non-food items siring kan dignity kits, mga kawatan para sa mga aki, mga bulong, portable toilets asin iba pang magagamit kan mga evacuees.
Mientras tanto, mantenido man sa labi P48.9 million an cost of assistance kan Provincial Government of Albay asin mga nakakasakop na local government units hale sa anom na banwaan asin tolong ciudad na apektado.
