LEGAZPI CITY — Pigrerespeto kan mga alkalde sa banwaan kan Guinobatan sa Albay an iniluwas na listahan kan narcopoliticians kan Philippine Drug Enforcement Agency (PDEA).
Sa ekskulsibong intrevista kan Bombo Radyo Legazpi kay Mayor Gemma Ongjoco, ipighayag kan opisyal na ikinamundo an nagluwas na datos kun saen an pinamamayohang banwaan an may pinakadakol na nangaranan sa bilog na probinsya.
Susog sa narco-list, sa 19 na kapitan sa Albay, 10 kaini an hale sa Guinobatan.
Maabot man sa 14 an kaibanan sa 31 barangay kagawad sa probinsiya an nasa listahan man.
Sa isinagibong closed-door meeting kan mga alkalde sa bilog na probinsiya, ipighayag ni Ongjoco na napagdesisyunan na magsagibo nin re-validation kan listahan.
Nagtutubod kaya an mga ini na posibleng bako updated an listahan huli ta poon kan ipinaotob an Oplan Tokhang kan Philippine National Police kan nakaaging taong 2016 hasta 2017, may mga nagsurendir na, nagkua nin sertipikasyon hale sa Department of Interior and Local Government (DILG) saka nagbagong buhay.
Mientras tanto, ipigdugang pa ni Ongjoco na pwedeng may naisumiter o dae naisumiteng aktibidad asin report kaya posibleng bakong validated an listahan.
