Nagpahayag nin pagduda an National Police Commission (Napolcom) sa mga alegasyon kan driver kan aktres na si Rhian Ramos na suboot pisikal ining inabuso kan duwang pulis sa Makati City.
Sa sarong ambush interview sa National Bureau of Investigation (NBI), sinabi ni Napolcom Executive Officer Rafael Calinisan na base sa nahiling niya sa CCTV footage sa laog kan Makati police station, wara suboot siyang nahiling na malinaw na evidencia na nakulugan an complainant na bisto sa alyas na “Totoy.”
Segun ki Calinisan, habo niyang pangenotan an imbestigasyon alagad dae suboot nahilingan sa CCTV footage na pig-abuso an driver sa anuman na paagi.
Huli kaini, dae pa nagsugo an Napolcom nin motu propio investigation.
Dugang pa kaini, pighahalat na sana ninda an pormal na reklamo ngani na masuri kun an mga pigtataram na galos o marka an tugma sa posibleng lugad na sinapo kan complainant.
Sinabi man ni Calinisan na sagkod ngonian, wara pa nin pormal na reklamo na isinangat sa saindang opisina.
Naenot nang pigdoon ni “Totoy” na binugbog siya kan duwang pulis ngani na akuon an suboot paghabon kan sarong ‘pulang ampao’ na may laog na mga sensitibong ladawan.
Mientrastanto, dae pa man pigpapaapod kan NBI si Ramos asin mga beauty queen na sinda Michelle Dee asin Samantha Panlilio na inakusaran man ni Totoy nin torture asin illegal detention.
 has expressed doubt over allegations by the driver of actress Rhian Ramos that she was allegedly physically abused by two police officers in Makati City.){kind=link}