LEGAZPI CITY—Nasulo an nakatambak na paroy kan mag-agom na senior citizen sa Barangay Bagacay, Legazpi City, Albay.
Segun ki Rosita Ocampo, sarong senior citizen asin tagsadiri kan paroy na nasulo, sa intrevista kan Bombo Radyo Legazpi, na bandang ala-una nin maagahon kan may nagpukaw sainda ngani i-report na nasusulo an saindang paroy na nakatambak sa gilid kan tinampo kan nasabing lugar.
Susog sa salaysay kan nakahiling na lalaki, na mantang ini nag-ihi, napansin kaini na may asó asin tulos na pighanap kun saen ini hali.
Kan saiya nang maaraman an lokasyon, inapod kaini an saiyang tugang na lalaki nganing palsukon an kasulo.
Dugang ni Ocampo, duwang banggi nang nakatambak an saindang paroy asin pighahalat na sana ninda an ma-thresher kaini.
Pigkarkulo na maabot sa duwang sako an nasulong paroy.
Wara man na nahiling na ano man na ginamit sa pagsulo, asin sa presente, wara pa sindang ideya sa kun siisay man an posibleng naggibo kan nasambitang kasulo.
Sa presente, nai-report na sa barangay an insidente.
