LEGAZPI CITY- Tinawanan nin pagreconocer kan Bacacay Municipal Police an solong scholar kaini sa banwaan katakod kan nangyaring pagtatapos sa sekondarya.
Binisto an maswerteng estudyante na si Girlie Angel Lopez na nag-graduar sa Pili National High School sa rating na 94 asin klasipikado bilang ‘With Honors’.
Sa intrevista kan Bombo Radyo Legazpi ki PC/Insp. Domingo Tapel Jr., napag-araman na parte an nasabing estudyante kan Albay Police Provincial Office Scholarship Foundation, Inc. na pinunan pa sana kan nakaaging taon.
Sa irarom kan nasabing programa, nagpipili an kada hepatura kan pulis sa provincia nin saro hasta duwang kwalipikado asin indigent na estudyante na pigtatawanan nin financial assistance sa kada bulan.
Obheto kan nasabing programa na makatabang sa mga jovenes na igwang potensyal alagad pigkakapos sa aspetong pinansyal sa pagklase.
Mientras tanto, nasa proseso pa man nin consolidation an nasabing scholarship foundation katakod kan pipilion sa komitiba na limang estudyante na mapadagos sa kolehiyo.
Inengganyar man ni Tapel an iba pang stakeholders na magtabang tangarig na mas dakol pang mga nangangaipong estudyante an maabot kan programa.
