LEGAZPI CITY- Nagtitinir pa sa evacuation centers an labi sa 1,000 na pamilya sa Jovellar, Albay makalihis an pagtama kan duwang magkasunod na bagyo sa nasyon.
Segun kay Jovellar Mayor Jorem Arcangel sa intrevista kan Bombo Radyo Legazpi, nakapag tao na sinda nin food packs sa mga apektadong residentes hali sa Department of Social Welfare and Development.
Segun sa alkalde na uminabot sa haros duwang poste nin kuryente an tubig baha sa Barangay Aurora kan nasabing banwaan.
Dugang kaini, dae pa man suboot maagihan an main road sa saindang lugar.
Enot namang nagrequest an lokal na gobyerno sa mga ahensya kan gobyerno sa pagsasaayos kan river widening alagad 1km pa lang suboot an narerelease asin igwa pang natatada na 6km para sa river widening.
Hali kaya an tubig sa mga pagtaraning na banwaan arog kan Camalig, Daraga asin Guinobatan na nagbabagsak sa saindang mga salog.
Mientrastanto, pangapudan man kaini na mapakarhay na an suplay kan saindang kuryente kun saen haloy ng problema an low voltage kan kuryente.
