LEGAZPI CITY- Dagos-dagos na an mga lakdang na ipigsasagibo kan local officials sa provincia kan Albay tangarig na entero nang magbalik sa normal an buhay kan mga residenteng pinauli makalihis na ibaba sa Alert Level 3 status an bulkang Mayon.
Katakod kaini, segun ki Presidential Adviser on Political Affairs asin Mayon Eruption overall crisis manager Secretary Francis Tolentino, ibabalik na man suboot an nagkapirang pasilidad na pinagamit sa Mayon evacuees sa kasagsagan kan eruptive stage kan bulkan.
Kaibanan sa mga kukuhaon na kan service providers an mga portable toilets na dadarahon na sa Manila alagad igwa namang donated facility siring kan permanent toilets asin communal kitchen na ipinatindog kan Tagaytay tangarig na magamit kan mga eskwelahan dawa pa patapos na an Mayon activity.
Mientras tanto, pigpaplanuhan na man kan mga alkalde kan siyam na local government units (LGUs) sa provincia an ititindog na permanent evacuation center.
Pighihiling na dakula an maitatabang kaini tangarig na dae maapektaran an laog kan mga estudyante sa mga eskwelahan na nagsisirbeng temporary shelters kan mga evacuees durante kan kalamidad.
