LEGAZPI CITY-Pinayuhan kan mga kongresista an Department of Education (DepEd) na magin maingat asin tawan nin pansin an mga praktikal na aspeto siring kan logistics asin kapasidad na magresibe kan mga pagbabago bago tuluyang pahiwason an school-based feeding program (SBFP).
Makalihis ini kan pagorolay kan House Committee on Basic Education and Culture mapadapit sa propwestong ley na obhetong ibale an gabos na estudyante poon Kindergarten hasta Grade 6 sa feeding program.
Igwa man suboot na dapat tawan nin pansin sa propwesto ngani masakop kaini an gabos na estudyante sa Junior asin Senior High School na nakaeksperyansya nin kakulangan sa nutrisyon.
Segun kay DepEd Bureau of Learner Support Services Director Miguel Angelo Mantaring, bukas an saindang ofisina sa ideya kan pagpapahiwas kan programa ngani makabale an gabos na estudyante sa pampublikong eskwelahan sa bilog na nacion.
Nagpahayag man nin pagkahandal si Committee Chair Roman Romulo mapadapit sa kakayanan kan DepEd na ipaotob an mahiwasang malawakang feeding program kun sakop kaini an pigkakarkulong 26 milyong estudyante na dai naapektaran o maisasakripisyo an kalidad kan edukasyon para sa mga estudyante.
Aminado man si Director Mantaring na an DepEd wara pang bastanteng kapasidad ngani suportaran asin pamayuhan an sarong implementasyon para sa mahiwasang programa.
