LEGAZPI CITY – Kontra an nagkapirang estudyante sa naging kasuguan kan gobyerno na isabay na sa flag ceremony sa mga eskwelahan asin unibersidad an Bagong Pilipinas Hymn asin Pledge.
Segun kay Kenneth Joshua Borromeo sarong law student, bilang sarong estudyante, dae man suboot ninda nasasabutan kung ano pa an obheto kan pagdadagdag kan bagong hymn asin pledge.
Base sa Malakanyang obheto suboot kaini na maengganyar an mga Pilipino na magtrabaho asin maghigos pa ngani na maabot an pangaturogan na bagong Pilipinas.
Alagad segun kay Borromeo, dipisil na mainspire kung wara man nin namamatian na pagbabago asin kung mas dakol na pasakit asin kadipisilan an nai-eksperyensyahan kan mga Pilipino.
Imbes suboot na maggastos sa pagpapagibo nin bagong kanta mas maray kung maggibo na sana nin mga programa na may direktang epekto asin nakakatabang sa mga Pinoy.
Pangapudan pa kan law student na mas tutukan kan gobyerno an mga programang pigkakahampang kan mga Pilipino siring kan padagos na inflation, kakulangan nin suplay nin mga produkto, kakulangan nin trabaho, mahal na gastos sa pag-aadal asin iba pa.
