LEGAZPI CITY—Buminungkaras an sarong kasulo na nagresulta sa pagkakadestroso nin nagkapirang estruktura an nangyari sa Barangay Centro, Masbate City.
Segun ki Bureau of Fire Protection Masbate City Fire Officer 2 March Capellan, sa intrevista kan Bombo Radyo Legazpi, isinakat sa second alarm an kasulo kun saen tulos man ining nirespondehan kan saindang ahensya magin kan ibang fire stations, fire volunteers, asin iba pang ahensya kan gobierno.
Sinabi kaini na tulong residential house, boarding house, asin commercial structure an nadamay sa nasambitang kasulo.
Sa presente nagpapadagos pa an imbestigasyon kan ahensya sa kun ano an kawsa kan insidente.
Dugang kan opisyal, pigkakarkulong nasa P792,000 an danyos na iwinalat kan kasulo asin walo man na pamilya an naapektaran.
Mientrastanto, pig-abisuhan man ni Capellan an publiko na imantenir an kalinigan kan kapalibutan asin kaharongan, siring man an pag-check kan electrical wirings nganing maibitaran an ano man na insidente nin kasulo.
Afuera digdi, sinabi man ni Capellan, na en kaso man may mga emerhensya dapat ibitaran muna an pagkua nin mga video, ladawan, pag-live sa social media, asin dapat enoton na maghagad nin tabang sa mga otoridad nganing amay man ining marespondehan.
