LEGAZPI CITY-Nadanyaran an nagkapirang establisyemento asin eskwelahan sa provincia kan Albay huli sa nairehistrong magnitude 5.3 na linog kan aldaw nin Biyernes, Hunyo 5, 2026.
Segun kay BFP Bicol Regional Director Fire Senior Superintendent Achilles Santiago, sa intrevista kan Bombo Radyo Legazpi na nakipag-koordinar sinda sa local disaster risk reduction and management office asin building officials para sa insiyal na datos.
Napag-araman na apat na munisipyo an naidentipikaran na igwang danyos sa establisyemento sa Sto. Domingo Albay.
Kun sain nagkaigwa nin minor road line crack sa parte kan Barangay Buhatan, mantang wara man nin danyo sa ibang public school buildings asin residential asin coastal barangay.
Mientras tanto, sa ciudad kan Legazpi, nairehistro an nagkapirang crack sa sarong mall asin sa Legazpi City Science High School.
Nai-report man sa Camalig, Albay an mga crack sa mga lanob asin kisame partikular na sa old school building kan Tagaytay Elementary School.
Siring man sa Bacacay, Albay kun sain nai-rehistro an danyos sa rural health building, partikular na sa comfort floor asin ground floor buildings kaini, asin sa Cagraray District Hospital na nagkaigwa man nin danyos sa mga building.
Presente man na pigmo-monitor an mga structural damage sa mga building asin imprastraktura, orog na sa mga school buildings bilang pag-antisipar sa pagbubukas kan klase sa Lunes, Hunyo 8, 2026.
