LEGAZPI CITY-Pignegaran kan dating Aktres na si Nadia Montenegro na naggamit siya nin marijuana o nagsigarilyo sa comfort room kan Senado.
Basado sa incident report kan Office of the Sergeant-at-Arms, inamin niyang may dara siyang vape sa saiyang bag, na suboot posibleng hale digdi an pigtutubudang matapang na parong.
Segun man kay Senate Security Officer Victor Patelo, duwang beses naiulat an insidente kan matapang asin bako pangkaraniwan na parong na hale mismo sa ladies’ comfort room harani sa extension offices kan mga senador.
Enot nang nairehistro an insidente kan Hulyo 2025 bandang alas-5 nin hapon.
Basado man sa mga impormasyon, sarong male staff an nagapod sa nakatalaga na security personnel sa ikalimang palapag ngani i-report an matapang na parong sa lugar.
Nakumpirma man kan guwardiya an kakaiba na parong alagad warang naobserbahan na nagsisigarilyo sa palibot kaini.
Mientrastanto, an ikaduwang insidente, nangyari suboot kan Agosto 12, 2025 sa parehong oras asin lugar.
Segun sa report, saro man na male staff hale sa opisina ni Senador Panfilo Lacson an nagsabing igwang parong na kahawig nin marijuana hale sa ladies’ comfort room asin nanotaran na si Montenegro man sana an nasa lugar.
Padagos man an pigsasagibong pagberipika kan Senado sa nasabing mga report.
