Nakisumaro an maabot sa 11 na mga negosyante sa Bicol an nakisabay sa nagpapadagos na OKB trade Fair sa Metro Manila.
Sa intrevesita kan Bombo Radyo Legazpi kay Dindo Nabol an regional Director kan DTI Bicol, sa taonang trade fair na isinasagibo sa ngunyan target kan mga MSME’s asin DTI na makapag-generate nin income na maabot sa P 25 million.
Kadakol na produkto hale sa Bicol an ipinagpapabakal sa trade fair obheto na mas mabidbidan pa an mga produkto sa National market asin sa mga turista.
Napag-araman na sa enot na aldaw na pagbubukas kan trade fair ay uminabot na sa P6 million an total na naging kita kan mga MSME’s.
Huli sa nagdadangadang na kapaskuhan ay naging mabenta man an mga pangdekorasyon na gibo kan mga Bicolano.
Padagos pa man an paglaom kan opisyal na malampasan an naging revenue kan nakalihis na taong OKB Trade Fair.
