LEGAZPI CITY – Padagos na naglalangkaw an numero kan mga kaso nin panghahabon, holdup, asin physical injury sa probinsya kan Albay.
Katakod kaini, sinabi kan Albay Police Provincial Office sa paagi kan tagapagtaram kaini na si PCI Arthur Gomez na igwa na sindang pigbibilog na plano ngani na madakop an mga suspek na imbwelto digdi.
Sigon ki PCI Gomez, sierto sinda na sarong grupo an mga ini kun kaya sainda nang pinag-aadalan an modus kan mga suspek.
Saro sa pigkokonsidirar na rason kan opisyal sa naglalangkaw na kaso nin robbery holdup sa Albay espesyalmente sa syudad kan Legazpi iyo an pagkakaigwa kaini nin dakol na pasyaran.
Dugang pa ni Gomez, mahigot nang iiimplementar an curfew ngani na maibitaran an mga siring na insidente kun sain nagigin biktima magin an mga jovenes.
Nagpatanid man ini sa publiko na kun posible, magtambay sa mga matawong lugar ngani na dae mabiktima kan mga hold-upper.
Nagsayuma ining ibuyagyag an plano kan pulisya katakod kan pagdakop sa mga suspek ngani na dae makapaghanda an mga ini sa saindang mga isasagibong lakdang.
