LEGAZPI CITY — Kritikal ngunyan sa ospital an sarong misis makalihis na pagbabadilon sa laog kan saiyang harong sa Purok 3 Barangay Salugan, banwaan kan Camalig.
Base sa impormasyon gikan sa Camalig Municipal Police, nabisto an biktimang si Cecille Nabor.
Sa isinagibong imbestigasyon kan mga otoridad, napag-araman na dae nin kaibanan sa saiyang harong si Nabor kan mangyari an pambabadil bandang ala 1:00 nin maagahon kun sain bigla na sana suboot naglaog an dae nabistong suspek asin pinaputukan nin pirang beses an biktima.
Nagsapar nin mga tama nin bala sa hawak si Nabor na tulos man na idinalagan sa ospital.
Sa presente, padagos pa ining pigbubulong sa Bicol Regional Teaching and Training Hospital (BRTTH) mantang nagsasagibo na nin hirarom na imbestigasyon an nasambitan na pulisya katakod kan nasambitan na insidente.
