LEGAZPI CITY – Padagos na nagdadakol an numero kan mga truck na nakapila sa Pioduran port kasunod kan pagpapakarhay kan San Juanico bridge sa parte kan Visayas.
Segun ki Pio Duran Municipal Disaster Risk Reduction and Management Office head Noel Ordoña sa intrevista kan Bombo Radyo Legazpi na nagruso an mga truck sa saindang banwaan hale sa Matnog port nganing magbakasakale na makasakay huli sa sarong byahe kan shipping lines na nag-oofresir nin connecting travel hale Masbate pasiring sa Cebu.
Dae suboot maaakomodar sa laog sana nin sarong aldaw an gabos na mga truck huli ta hahalaton pa kan mga ini na maisingit sinda kan nasabing shipping line.
Piglalaoman ninda an pagdakol kan mga truck hangga’t nagpapadagos an rehabilitasyon kan nasabing tulay na nagkokonektar sa Samar asin Leyte.
Pigtaram pa kan opisyal na naghanap nin alternatibong ruta an mga truck pasiring sa Visayas asin Mindanao huli sa pagsasarado kan tulay kun kaya nagtyatyaga an mga ini na makasakay nganing makaduman sa saindang destinasyon.
Maski suboot makasakay an mga ini sa Matnog Port an dae man giraray sinda makakabalyo sa Samar kun kaya mas pinili kan mga ini na magruso sa Pioduran port.
Base man sa saindang pakikipag-olay sa mga driver asin pahinante na mahalat sinda hasta pirang aldaw basta makasakay sana suboot asin makauli sa saindang lugar sa Visayas asin Mindanao.
Pighayag man ni Ordoña na padagos an saindang pakikipakoordinar sa Department of Social Welfare and Development nganing matawan nin magkakanigong tabang an mga stranded na mga byahero asin naki-olay sa saindang nasasakupan na tabangan an mga ini.
