LEGAZPI CITY- Mahigot na ipinagbabawal sa syudad kan Legazpi an paglaog kan mga tricycle sa Rizal St. katakod kan No Entering the National Road Policy.
Alagad sigon sa pamayo kan BCERG na si Kagawad Bong Samar, igwa man nin mga konsidirasyon sa polisiyang ini.
Saro digdi an mga tricycle na pigagamit sa negosyo arog kan pagdeliver nin tubig gikan sa mga water refilling stations.
Tinawan duon ni Samar na kinakaipuhan kaining maghagad nin special permit ngani na dae libreng makaagi sa nasambitan na tinampo.
Klinaro man kan opisyal na sa laog kan ordinansa, dae man partikular na sinabing bako kabale sa mga pwedesir na ticketan an mga pribadong tricycle kun kaya dae ini makakasalbar sa mga tauhan kan BCERG.
Dugang pa kaini, maski pinagbawalan nang mag-agi an mga tricycle sa national road, dakol pa man na alternatibong dalan na pwedesir kaining agihan.
