LEGAZPI CITY — Pigsasapinal na ngunyan kan Mines and Geosciences Bureau (MGB) an listahan kan mga quarry sites na nag-ooperate na warang permit.
Ini makalihis an ipigkondusir na quarry inventory kan ahensya ngani na ma-monitor an mga iligal na nagsasagibo nin quarry operations.
Sa intrevista kan Bombo Radyo Legazpi ki Byron Mitchell Suratos, Senior Geologist kan MGB, pinaglalaoman na maipapaluwas na sa mga masunod na aldaw o semana an nasambitan na listahan ngani na mapanimbag an mga mapapatunayan na igwang bayolasyon sa ley.
Segun sa opisyal, dakol na mga quarry sites sa Bicol region an warang Environmental Compliance Certificate (ECC) asin permit partikular na sa Camarines Sur alagad nagigibo na nin paagi an ahensya ngani na mapahigot an saindang mga polisiyang pigpapaotob.
Dugang pa ni Suratos na enkasong mapatunayan sa imbestigasyon na igwang naging bayolasyon an mga ini, tatawan sinda nin cease and desist order ngani na mapundo na an operasyon.
Pigduon kan opisyal na nagtatao nin permit sa mga ini ngani na masiertong dae naaapektaran kan operasyon an kapalibutan asin warang maapektaran na mga residente kaya dapat sanang sumunod sinda sa ley ngani na maipagpadagos an negosyo.
