LEGAZPI CITY – Ipigbubusol ni Senator JV Ejercito an mga ley na makakatabang na mapakusog an mga paraoma o an sektor kan agrikultura.
Saro na digdi an Senate Bill No. 1199 o an Free Irrigation Act na obhetong mapapundo an paniningil nin bayad sa patubig na presenteng nasa iraraom kan pag-aataman kan National Irrigation Administration (NIA).
An propuestong ley na Senate Bill No. 332 o Anti- Rice/ Corn Hoarding and Profiteering Act an nakapokus man sa pagbabawal sa pagsubi nin bagas o mais na iyong rason kan padagos na pagbaba kan presyo kaini sa merkado.
Mantang an pangatulong Senate Bill No. 330 o an Agricultural Technology Generation & Transfer Act an modernisasyon kan pag-uma sa paagi kan pagtagama nin pondo para sa pag-aadal asin pagtukdo kan mga bagong teknolohiya kasabay na an makabagong mga ekipahes.
An panghuring Senate Bill 1550 o Watershed Protection Act an obhetong matawan nin proteksyon an mga watershed na nagseserbing katabang kan mga irigasyon na imantenir an bastante asin warang pundong daloy nin tubig para sa mga paraomang Pilipino.
Awpera pa kaini, tinukar man ni Ejercito sa pagbisita kaini sa Sorsogon an iba pang pigbubusol na ley na para sa mga paraoma arog kan RA 108450 Anti-Agricultural Smuggling Act, RA 108160 o Farm Tourism Development Act asin RA 106590 o Sugar Cane Industry Act.
