LEGAZPI CITY – Pig-aagrangay kan mga paratienda sa Legazpi City People’s Park an sadayot na espasyo asin maluyang pagka-gibo kan saindang mga stall na pig-rentahan.
Segun kay Alyas “Kristine”, saro sa mga paratienda sa nasambitang parke sa intrevista kan Bombo Radyo Legazpi na kinaipuhanan nindang dugtungan nin suyap o extension an saindang stall na narentahan nin huli ta sadayot an espasyo kun kaya padifisilan ini sa saindang negosyo.
Agrangay man kan mga nagkapira na maluya an pagkakonstruher kaini kun kaya nagtatagdo sa bubong kan saindang stall partikular na kun nakakamati an ciudad nin makukusog na pag-uuran.
Wara man sindang magiginibo sa saindang na-pwestuhan nin huli ta inagi suboot ini sa raffle kun sain sindang stall ma-pwesto.
Kun sindang mga paratienda an hahaputon, warang problema kun halion an saindang suyap alagad tugutan na sana sinda na pagayunon an saindang espasyo.
Pigtaram pa kaini na naapektaran an saindang negosyo huli sa ka-sadit na espasyo na itatao sainda urog na kun dakol an saindang pigpapabakal.
Kahagadan ninda an konsiderasyon na tugutan sinda mag extend dawa kusina na sana suboot nganing mapamaray an saindang kamugtakan sa pagtitienda.
Pigdoon man ni alyas “Kristine” na duwa sana an saindang pagpipiliian, iyo an matios na sana sinda enkaso dae tugutan asin mapasalamat sinda enkaso man na tugutan sindang mag extend kan saindang espasyo.
