LEGAZPI CITY – Pig-aagrangay kan mga paratienda nin sira sa ciudad kan Legazpi an maluyang demand nin sira ngonian na southwest monsoon season.
Segun ki Romeo Balderama sa intrevista kan Bombo Radyo Legazpi na sa haros 20 taon kan pagtitinda nin sira, kada panahon nin habagat siya nadidifisilan sa pagtitienda kaini.
Nagigin kawsa kaya kan suboot nasabing weather phenomenon an pagmahal kan presyo kan sira asin an dae paglawod kan mga parasisira huli sa dara kaining makukusog na ukol sa kadagatan.
Hasta sa ngonian an nagtetenir na maluya an barakalan ki sira kompara kan nakaaging mga bulan.
Pigtaram pa kan naunambitang paratienda na piggigibo na sana nindang diskarte iyo an pagbakal sana nin diit nganing dae man masayang enkaso dae bakalon kan mga konsyumer.
Aminado siya na nag-aaray man an mga parabakal alagad wara man siyang maginibo huli ta pwedesir man na ikalugi niya kun bababaan niya an presyo kompara sa kuwa niya sa mga parasisira.
Mantang minsan suboot an wara na siyang nauuli sa saiyang pamilya huli sa pagsayuma kan publiko na magbakal nin sira.
Pangapodan sa presente ni Balderama sa gobierno na tabangan sinda huli sa maluyang barakalan ki sira ngonian na habagat season.
