Legazpi City-TUlos na nagsagibo nin evacuation effort an Barangay Burabod sa banwaan kan Libon bilang pag’andam sa posibleng epekto ni Bagyong Pipeto na pinaglalaoman na malaog sa PAR ngunyan na Aldaw.
Sa intervista kan Bombo Radyo Legazpi kay Kap. Erwin Perez, Kapitan kan Barangay Burabod, Libon Albay, nagpaapod nin emergency meeting si Mayor Das Maronilla bilang preparasyon sa posibleng epekto kan bagyo.
Bilang kasimbagan man sa kasuguan kan Alkalde tulos na ipinag-ibakwar an maabot sa labi 400 na mga pamilya sa Barangay gikan sa Zone 1,2,3 asin 4.
Maabot man sa 124 na pamilya an dinara sa San Vicente Multi-Purpose hall, mantang an nagkapira an nagtitinir sa mga pribadong kaharungan sa barangay. Dugang pa kan opisyal maabot man sa 161 na pamilya an nagtitinir sa relocation site sa Sitio Kigasang kan Barangay.
Mientras tanto pinagirumduman man kan opisyal an mga residente na maging alerto asin tulos na magpasiring sa mga salbadong lugar lalo na sa mga lugar sa Barangay na enot na man na naapektaran kan Landslide huli sa nakalihis na bagyong Kristine.
Dagos man an pag-abot kan mga ayuda lalo na sa relief goods asin tubig sa mga residente na nagtitinir sa evacuation centers.
