LEGAZPI CITY—Makundusir nin sarong search and rescue operation an mga otoridad kan Pandan sa Catanduanes makalihis na may nai-report na nawawarang parasisira gikan sa banwaan.
Segun ki Hon. Raul Tabirara, an alkalde kan banwaan kan Pandan, Catanduanes, sa intrevista kan Bombo Radyo Legazpi, duwang magkairibang bangka na may lunad na siyam na katawo an hanggang sa ngunyan dae pa nahahanap.
Susog sa impormasyon, an sarong bangka may limang lunad kun saen puros ining tagabanwaan kan Pandan, Catanduanes, mantang an saro igwa nin apat na lunad na parasisira gikan sa ciudad nin Tabaco sa probinsya kan Albay.
Dugang kan opisyal na an problema kan saindang mga rescuer na mahanap sa mga parasisira sa ngunyan iyo an makusog na paros asin hukol sa kadagatan.
Sa presente, wara pa man suboot sindang nareresibing ano man na impormasyon sa mga kataid na mga lugar.
Dugang digdi na nagtao naman an saindang opisina nin asistensya siring kan food packs asin cash assistance sa mga pamilya kan mga nawawarang parasisira.
Nakipagkoordinar naman suboot sinda sa gobyerno provincial kan Catanduanes para sa sarong aerial inspection.
Magigiromdoman na kan pagkaaga kan Enero 1, an mga naunambitang parasisira nagpasiring sa kadagatan asin nakatalaan na mag-uli kuta kan Enero 5, alagad huli kan makusog na paros asin hukol dae pa ini nakakabalik sa saindang lugar.
