LEGAZPI CITY – Nangapodan an mga opisyal kan Brgy. Victory Village sa syudad nin Legazpi sa saindang gobierno lokal nin long term solution makalihis an pinakabagong insidente nin landslide sa saindang barangay.
Segun kay Julie Bahoy, kagawad kan naunambitang barangay sa intrevista kan Bombo Radyo Legazpi na puro sana road clearing an pigsasagibo kan gobierno sa 3 insidente kan pagrasay nin daga sa saindang lugar.
Bako sana clearing operation suboot an kinakaipuhan kundi permanenteng solusyon para na man sa seguridad kan mga residente.
Mientrastanto, wara man nadanyaran nin huli ta sarong bulan na ninda ining sinarado makalihis man na mangyari an naenot na landslide.
Nagtetenir na sarado an two lanes kan tinampo na rinasayan kan daga para na man sa kaligtasan kan mga motorista asin pig-aabisuhan na maghanap nin mga alternatibong ruta nganing makaduman sa saindang papadumanan.
Pag-istorya ni Bahoy na mga bandang alas kwatro nin maagahon nangyari an landslide asin tulos niya ining pigreport sa saindang kapitan.
Pangapodan kaini sa saindang residente na dae na muna magluwas partikular na kun magpadagos pa an namamateang raot nin panahon.
