LEGAZPI CITY- Maabot sa 3 sagkod 4 na oras na sana an katurog kan nagkapirang mga Overseas Filipino Workers sa Lebanon huli sa burubangging pambobomba kan Israel sa Muslim area kan Lebanon.
Segun kay Mercy Mustera, an Bombo International News Correspondent sa Lebanon, kabado na ini alagad immune naman sa padagos na kariribukan na nairehistro sa nasabing nasyon.
Istorya kaini na haros wasak na an gabos na mga establishimento sa Dahye Airport na target kan Israeal kun saen pigtutubudan na duman nakatago an mga armas kan mga Hezbollah.
Nag-ebakwar naman suboot an nagkapirang mga sibilyan sa lugar magin an mga OFWs an nasa salbadong lugar naman sa ngunian.
Mientrastanto, sa Oktobre 12 nakatalaan an liwat na repatriation sa mga OFWs pabalik sa Pilipinas alagad dae man liwat ini mauli sa nasyon huli sa pagpensar na daeng itataong trabaho sainda an gobyerno kan Pilipinas.
Segun pa kay Mercy na dae man sinda pigpapabayaan kan Embahada sa Lebanon asin nagtitinir man ining salbado sa ibong kan naglalangkaw na tensyon sa lugar.
