LEGAZPI CITY-Ipighayag kan Department of Justice na posibleng bako sanang 34 an nawawarang parabulang alagad posibleng labi sa 100 an biktima.
Ini an ipinaabot ni Secretary Jesus Crispin Remulla kan nasambitang departamento makalihis na siya haputon manungod sa mga nawawarang parabulang.
Sinabi pa kan Justice Secretary na basado sa mga disclosures kan nakaolay niyang witness na binistong si alyas ‘Totoy’ posibleng siring kaini kadakol an biktima.
Sinambit man kaini na dai mababa sa 10 personalidad o pangaran an suboot imbwelto sa likod kan mga insidente nin pagkidnap asin paggadan.
Pigsierto man kaini sa publiko na pigpoproseso ninda an mga impormasyon na saiyang pigheheras.
Magigirumduman na nag-atubang an saro sa mga akusado ngani ihayag an aram niyang impormasyon mapadapit sa nawawarang mga biktima.
Ipinaisi kan nasambitang testigo na gadan asin nakalubong na an 34 na pighahanap na mga parabulang.
Huli sa impormasyon na ini, an saindang mga paryentes mawot makipag-olay giraray sa presenteng Secretary kan Department of Justice.
Tulos man na nagresponde si Remulla asin inasegurar na sinda na makikipag-olay, alagad sinabi niya na dai pa sa presente ngani maibugtak niya nin tama an mga impormasyon na ipapaabot.
Mientrastanto, dae pa masierto kung igwa nin katotohanan sa mga rebelasyon na pighayag kan daing ngaran na testigo manungod sa mga nawawarang biktima.
Alagad pig-asegurar kan namsambitang departamento na gigibohon ninda an gabos ngani madeterminaran an katotohanan sa likod kan isyu na dae pa nakukua sa laog nin apat na taon.
