LEGAZPI CITY – Puminakol na nin labi 580 an bilang kan mga nadakop na ayam an na-iturnover sa Provincial Impound Facility sa probinsya kan Albay ngunyan na papatapos na an taon.
Segun kay Albay Veterinarian Dr. Pancho Mella sa intrevista kan Bombo Radyo Legazpi na dae man nakakaabot sainda an mga nadadakop na ayam sa mga nagkapirang syudad asin munisipalidad sa probinsya nin huli ta irigwa man ini nin mga sadiring impounding area.
Afuera sa pagdakop nin mga nagbabalagaw bagaw na ayam, nagsasagibo man sinda nin pagkapon asin pag-ligate sa mga ayam nganing dae na magdakol an saindang mga bilang.
Dugang man kan opisyal na pwedesir makulugan, pag-punan nin rabies asin magadan an mga nagbabalagaw bagaw na mga ayam kun dae ini aatamanon nin maray.
Pigtawan doon man ni Mella na padagos an nagigin diskriminasyon sa mga hayop nin huli ta kadakol an mawot mag-ataman nin mga ayam kun sadit pa sana an mga ini asin pigpapabayaan na sana pag dakula nin huli ta bako na “cute” suboot sa saindang mga paghiling.
Pagirumdom kaini sa mga mawot magin pet owners na isipon nguna kun magigin responsable sinda sa pag-ataman asin dapat dae pagpabayaan na nagbabalagaw bagaw asin dae nagagakod an mga ayam nganing maibitaran an paglakop kan helang na rabies.
