LEGAZPI CITY- Blangko pa an mga kapulisan sa motibo sa pambabadil sa sarong paraoma na vlogger sa Barangay Mahaba sa banwaan kan Oas, Albay.
Segun ki Police Major Nathaniel Jacob, hepe kan Oas Municipal Police sa intrevista kan Bombo Radyo Legazpi na nakikipag kooperar man an mga posibleng testigo sa krimen alagad dae pa nakaka pag establishar nin kongretong impormasyon na makakapag tukdo sa mga suspek.
Nagluwas sa inisyal na imbestigasyon na basado sa tama kan bala sa biktima, posibleng sumpak na may bala nin shot gun an ginamit sa krimen.
Napag-araman na warang CCTV na naka install sa pinangyarihan kan krimen, mantang sa kataning na Barangay San Ramon an bako man an operational an CCTV huli ta nadistroso kan nakalihis na mga kalamidad.
Sa presente, sinabi ni Jacob na kaibanan sa mga pigbabantayan nindang anggulo an background kan biktima na pagiging sarong vlogger na posible suboot na may dagit kasunod kan pag komento kaini sa nagkapirang mga isyu.
Pighihiling man an iba pang mga kaalitan asin iwal pamilya.
Mientras tanto, nagapudan pa an opisyal sa posibleng makakapagtaong impormasyon dapit sa krimen na makipag koordinar sana sa saindang opisina.
