LEGAZPI CITY — Positibong sinabi kan Albay Police Provincial Office (PPO) sa paagi ni PCI Arthur Gomez na padagos na nagbababa an mga personang imbwelto sa iligal na pagsusugal.
Katakod ini kan saro pang kampanya kan gobyerno kontra sa illegal gambling na ipinasakamot sa Philippine National Police (PNP) ngani na maarestar asin masangatan nin magkakanigong kaso an mga madadakop na parawego.
Sinabi ni Gomez na huli na man ini sa pakikipagtabangan kan mismong komunidad sa paagi kan pagtao sainda nin impormasyon tuyong nagkakaigwa nin tupada, card games asin iba pang klase nin sugal.
Komon suboot na nagpapaabot sainda nin sumbong an mga residentes na naiistorbo kan ribok na pigkakawsa kan mga nagsusugal sa saindang barangay.
Mientrastanto, katakod kan pag-obserbar kan Semana Santa, sienerto ni Gomez na dae mapapabayaan kan Albay PNP an anti-illegal gambling operations kun sain igwa nin suway na team para digdi siring man an all-purpose patrol para sa gabos na manonotarang iligal na aktibidad.
Sa ngunyan, nakapagrehistro na an mga kapulisan sa Albay nin 54 matrayumpong operasyon kun sain 193 an naarestar asin P26, 051 an nakumpiskar na taya puon kan Pebreo 3 sagkod Abril 12 sa presenteng taon.
