LEGAZPI CITY – Ikinadismaya kan grupong Alliance of Concerned Teachers an ginibong pagtapyas kan pondo kan Department of Education para sa masunod na taon.
Magigirumduman kaya na binawasan nin haros P12 bilyon an tanggapan sa propwestong 2025 national budget sa isinagibong Bicameral Conference Committee report.
Segun kay Alliance of Concerned Teachers Chairperson Vladimer Quetua sa intrevista kan Bombo Radyo Legazpi na labing namumundo an mga grupo kan paratukdo nin huli sa pagtapyas kan pondo na para kuta sa pagpapagayun kan sektor kan edukasyon sa nasyon.
Papalangkaw nin papalangkaw suboot an nagigin budget kan DepEd sa mga nakalihis na taon kun kaya kinakigkig ninda an pagkakabawas nin arug kaito kadakula na kantidad sa departamento.
Pighahapot kaini na ngata binawasan an pondo sa ibong kan pagkakaigwa nin dakulang kantidad kan National budget urog nang mas kinakipuhan ngunyan kan departamento nin kadugangang pondo para sa pagpapakarahay kan mga naraot na eskwelahan sa nasyon.
Base man sa paghiling ni Quetua na may kinaaraman suboot an pagdakol kan pundo para sa ayuda nin huli ta kaipuhan ini kan mga politiko ngunyan na paparani na an eleksyon kun kaya mas pinili ninda na taasan an budget sa ayuda asin bawasan an sa sektor kan edukasyon.
Nagtaasan man suboot an sa lado kan imprastraktura, confidential funds asin utang pangluwas kun kaya nagluluwas suboot na warang nahihilingan sa mga promesa kan Presidente na tatabangan an gabos na mga sektor sa pilipinas.
Pigtawan doon kaini na an pigtapyas na pondo an makakatabang kuta nganing ma-modernized an mga paagi nin pagtuturo kan mga paratukdo nin huli ta dapat suboot nagsasabay an mga paratukdo sa mga bagong paagi nin pagturo sa mga estudyante.
