LEGAZPI CITY-Kinumpirmar kan Bureau of Customs (BOC) na nasa saindang kustodiya na an kabilugang 28 luxury cars na igwang koneksyon sa pamilyang Discaya.
Kusang isusuko sa maabot na Setyembre 4 kan pamilya an 16 pang mga magagarbong behikulo, afuera pa ini sa 12 na naenot nang nakolekta sa bisa kan search warrant sa compound kan St. Gerrard Construction General Contractor & Development Corporation sa Pasig City.
Ipighayag man kan Bureau of Customs na saindang iimbestigaran man magin an kamag-anak kan pamilya Discaya dapit sa mga ‘luxury cars’ kasunod kan isyu sa flood control projects.
Segun kay Customs Commissioner Ariel Nepomuceno, parte suboot ini kan saiyang mahiwas na imbestigasyon na ipigsasagibo kan mga kagawaran.
Kun sain katuwang suboot digdi an Land Transportation Office ngani makakuwa nin impormasyon sa mga sasakyan na nakapangaran sa mga imbueltong kontratista asin sa saindang mga kapamilya sa nasabing kontrobersiya.
Alagad, saiya man na piglilinaw na dai man suboot sinda nakapokus sana sa pamilya Discaya o magin sa pigsususpetsyahang igwang mga iligal na transaksiyon asin pagsadiri kan mga suboot nasa 80 mga ‘luxury cars’.
Tutukan man suboot niya an kagawaran kun igwang mga property pa na ilegal na ipinuslit sa laog kan nacion.
