Nagmamawot an mga auto manufacturer sa Pilipinas na maabot an target unit sales na 500,000 sa taong 2025.
Kun sain mas halangkaw ini kaysa sa 467,000 unit na naipabakal kan nakaaging taon.
Segun kay Atty. Rommel Gutierrez, presidente kan Chamber of Automotive Manufacturers of the Philippines Inc. (CAMPI), kumpiyansa sindang maaabot an target na ini nin huli sa mga bagong modelo kan behikulo na inilunsar asin ilulunsad pa sana.
Basado man sa datus kan CAMPI asin kan Truck Manufacturers Association of the Philippines (TMA), uminabot sa 37,604 na unit an naipabakal kan nakalihis na Enero, kun sain naghalangkaw ini nin 10.4% hale sa parehong bulan kan nakaaging taon.
Sa mga datus, 1,445 unit an hybrid electric vehicles (HEVs), 146 an battery electric vehicles (BEVs), asin siyam an plug-in hybrid electric vehicles (PHEVs).
Nangengenot pa man giraray an Toyota Motor Philippines Corp. sa merkado na may 48.07% na sales kan Enero, sinundan kan Mitsubishi Motors Philippines Corp. na may 19.61%, asin Nissan Philippines Inc. na may 6.29%.
