LEGAZPI CITY- Nasa kustodiya na ngunian kan Municipal Social Welfare and Development Office kan Daraga Albay an sarong 17 anyos na estudyante makalihis na akto ining nadakop na naggagamit nin marijuana sa laog kan pampublikong eskwelahan sa nasambitang banwaan.
Segun kay Pltcol Edmundo Cerillo, an Chief of Police kan Daraga Municipal police station sa naging intrevista kan Bombo radyo Legazpi, nakaresibe sinda nin apod gikan sa Daraga Public Safety Office asin nag-impormar manungod sa naaprehendir kan sarong watchman kan eskwelahan na sarong estudyante na naggagamit nin pinagbabawal na bulong.
Nahiling ini mismo sa 3rd Floor kan eskwelahan partikular na sa laog kan CR.
Narekober digdi an maabot sa 40 grams nin marijuana na nagkakantidad nin labi sa P4,000.
Mientrastanto, makalihis an pagkakaarestar sa estudyante, tulos man na nagsagibo nin lecture an kapulisan sa mga kaklase kaini katakod kan pag-ibitar sa paggamit nin iligal na droga.
Abiso kaini sa mga estudyante na mag-adal nin marhay asin ireport sa saindang mga paratukdo kun igwa sindang naaaraman na naiimbwelto sa iligalidad ngane na tawan nin magkakanigong aksyon.
Dakula man an naging pasasalamat kan opisyal sa mga paratukdo asin sa mismong watchman kan eskwelahan huli sa pagiging vigilante kaini sa mga siring kaining pagbalgar.
Dugang pa kan hepe na magkakaigwa sinda nin iba pang mga paagi ngane na maibitaran an paggamit nin iligal na droga kan mga estudyante.
Pangapudan man kan hepe sa mga magurang na reparuhon an saindang mga aki ngane na maibitaran an pagkaimpluwensya sa mga iligal na aktibidad.
