Binadil an self-confessed drug lord na si Kerwin Espinosa mantang nangangampanya ini sa Albuera, Leyte.
Si Espinosa na nagdadalagan sa pagka-alkalde kan banwaan kan Albuera an binadil mantang nagtiripon an saiyang mga kapwa kandidato sa covered court kan Leyte gymnasium sa Barangay Tinag-an kan bigla ining badilon.
Irido si Espinosa asin an kandidatong vice mayor na si Mariel Marinay na tulos man na dinara sa ospital.
Nadamay man sa pambabadil an sarong menor-de-edad.
Nabatid na nakatukaw si Espinosa sa sarong monoblock chair asin nagpepreparar para sa saiyang pagtatalumpati kan ini pagbabadilon.
Segun sa mga nakahiling na an gunman an suboot nahiling na nagtatago sa kisame kun sain binadil si Espinosa kan ini nakatalikod.
Nagsasagibo na nin manhunt an kapulisan mantang padagos pang nagsasagibo nin masinsinang imbestigasyon para mabisto an responsable sa pambabadil.
Magigiromdomang si Kerwin Espinosa an nagin parte nin kontrobersya kan 2016 kan ikonekta ini ni dating Presidente Rodrigo Duterte sa ilegal na kalakalan nin droga sa Eastern Visayas.
Si Espinosa an aki ni dating Albuera mayor Rolando Espinosa na nagadan sa laog kan detention cell mantang nagsasagibo nin search operation an mga pulis sa Baybay sub-provincial jail kan 2016.
