LEGAZPI CITY – Dae na nagibong maisalbar an buhay kan sarong matadero makalihis na pagtitigbason kan sadiring amo sa Brgy. Zone 7, Bulan, Sorsogon.
Gadan an biktimang si Rodrigo Gueta alyas Tutay, 36 makalihis na pagtitigbason kan among si Roger Hermosa, 54.
Istorya ni PMaj. Joel Trinanes, hepe kan Bulan Municipal Police Station sa intrevista kan Bombo Radyo Legazpi, selos an pigtutubudang motibo sa insidente.
Segun sa hepe, nagdulok na sa hepatura kan pulis an suspek tangarig na isumbong an suboot pakikiapid kan agom na babayi ki Gueta alagad huli sa kakulangan nin ebidensya, dae pa man nasunadan nin kaso an duwa.
Alagad sa liwat na pagbalik ni Hermosa, ipigsurendir kaini an sadiri sa panggagadan ki Tutay makalihis na pagtitigbason sa may parteng bitis mantang nagkakaturog.
Dae na suboot kaini napugulan an sadiri urog na magin an saro sa anom na aki an nagkukumpirmar kan relasyon kan biktima sa esposa.
Mientras tanto, nakatalaan na sunadan nin kasong Murder an suspek sa nagibong pagbayolar sa ley.
