LEGAZPI CITY — (Update) Nakatalaan nang isangat para sa regular filing kan Masbate City Police an kasong patong-patong na panlulugos asin attempted rape sa sarong padre de pamilya sa ciudad kan Masbate.
Katakod ini kan pag-arestar kan 45-anyos na ama huli sa sumbong kan tolong menor de edad na aki sa panduwang agom kan pauro-utrong pang-aabusong sekswal kaini.
Apwera pa digdi, nagluwas man an matuang aki kan nasabing lalaki na edad 15 anyos na asin ipigbuyagyag na biktima man kan sadiring ama.
Sa intrevista kan Bombo Radyo Legazpi ki PC/Insp. Gerardo Balatucan, hepe kan Masbate City PNP, napag-araman na nag-ugat sa suplong kan saro sa mga aki sa school officials an operasyon kontra sa suspek.
Pighihiling na napabayaan kan ina an mga aki huli ta nagtatrabaho ini sa harayong banwaan kan Masbate mientras na nawawalat sa pangangataman kan parainom na ama an mga aki.
Nasa kustodiya na man kan nasabing hepatura an ama kan mga aki mantang nasa “Balay Pasirugan” sa Brgy. Pating an mga biktima.
Sa ngonian, pighahalat na sana kan mga otoridad an pagpapaluwas kan resulta sa medico legal kan mga biktima tangarig na pormal na ining maisangat mientras na isinairarom na man sa saro pang test an mga ini tangarig na makumpirmar an posibilidad na bados an duwa sa mga ini.
