LEGAZPI CITY – Ipigheras kan Department of Interior and Local Government (DILG) Bicol an mga update dapit sa seguridad kan rehiyon asin implementasyon kan Republic Act 9165 o an Comprehensive Dangerous Drugs Act of 2002 sa ipigkundusir na first regular meeting kan Regional Peace and Order Council (RPOC).
Enot na pighayag ni DILG Regional Director Eloisa Pastor na nagsumite ini nin duwang nominado na matukaw bilang chairman asin co-chairman kan RPOC ki DILG Sec. Ismael ‘Mike’ Sueno asin mismong si Presidente Rodrigo Duterte an nagrekomenda ki Legazpi City Mayor Noel Rosal na mamayo sa nasabing konseho.
Apwera kaini, nagpapadagos man suboot an saindang kampanya na MASA-MASID (Mamamayang Ayaw Sa Anomalya-Mamamayang Ayaw Sa Iligal na Droga) makalihis na mailunsar ini.
Posible man na maging target na i-pilot an MASA-MASID sa probinsya kan Catanduanes asin Camarines Sur huli sa dakula an akomplisiemento kaini asin naenot magresponde sa nasabing programa.
Magkakaigwa man suboot sinda nin social facilitators sa irarom kan nasambitang programa mantang padagos an saindang pag-organisa nin mga joven asin volunteers sa mga barangay.
