Nakatalaang ipagpa-eksplikar kan Commission on Elections (Comelec) si Senador Rodante Marcoleta katakod sa dae kaini pagdeklarar nin campaign donations kan May 12, 2025 midterm polls sa saiyang Statement of Contributions and Expenditures (SOCE).
Segun ki Comelec Chairperson George Garcia, padadarahan ninda nin show cause order (SCO) an senador sa mga masunod na aldaw mapadapit sa isyu.
Sa SOCE ni Marcoleta, wara siyang naresibe nin ano man na cash asin in-kind contribution para sa saiyang kandidatura.
Siring man, nagdeklarar ini nin P112,857,951.44 expenditures o nagastos sa saiyang pangangampanya.
Nagin kuwestiyonable man ini huli base sa Statement of Assets, Liabilities, and Net Worth (SALN) kan senador an igwa sana siyang net worth na P51.9 milyon.
Kalaunan an pigtuga kan senador na may mga kaibigan siyang nag-donar nin pondo sa saiyang kampanya kan 2025 polls alagad pigtuyong dae ideklara an mga naresibe na campaign donations nganing itao an kahagadan kan saiyang mga donors na magtenir sindang anonymous.
Segun ki Garcia, warang exemption sa pagdedeklarar kan donasyon o campaign contribution. An gabos kan donasyong naresibe kan sarong kandidato an dapat na ideklara asin ibuyagyag.
