LEGAZPI CITY—Makakaeksperyensya nin maluluyang suplay nin tubig an nagkapirang lugar sa ciudad kan Legazpi huli sa padagos na pagsasaayos kan water treatment plant.
Segun ki Legazpi City Water District General Manager Rico Salazar, sa intrevista kan Bombo Radyo Legazpi, ini huli sa may nanotaran an PhilHydro—na nagtatao sainda nin pump water supply—na may raot sa impeller kan 300 horsepower na pump makalihis na magkundusir nin schedule na paghiling sa mga ekipahe nganing mahiling kun may mga dapat pakarayon digdi.
Huli digdi kinaipuhang salidahan ini nin pump kan nakaaging semana.
Mantang matatapos man sa duwa sagkod tulong semana an pagsaayos kan impeller asin iba pang pump kan PhilHydro.
Boot sabihon suboot kaini na nagluya sa presente an ipigtao na tubig o nabawasan an volume asin pressure partikular na sa sakop kan Line 1.
Sa Line 2 mas diit man suboot an water disruption alagad may nagkapira man liwat an nakakaeksperyensya nin maluya na pressure kan tubig.
Sa presente, nakikipagkoordinar na an LCWD sa PhilHydro nganing mas maparikas an pagbalik kan pigpakarhay na pump.
Dugang ni Salazar na may nagkapira pang ibang lugar sa ciudad kan Legazpi an pigpakarhay an pump na nagresulta sa maluyang suplay nin tubig.
Kasabay kaini, pig-regulate man kan saindang opisina an tubig gikan sa Well No. 12 huli sa kulang an naglalaog sa 2,000 cubic system tank kan Bogña kaya makakaeksperyensya nin pagluya sa tubig an mga konsomedores na nasa norteng parte kan ciudad nin Legazpi.
Pig-asigurar man kan opisyal na bako sana mga panandalian na lakdang an saindang piggibo kundi pigpaplanuhan man ninda an panhaluyan na maibugtak na mga imprastraktura nganing dae na mautro an pagkaraot asin paghirahay kan nasabing water treatment facility.
Pigsuhestiyon man ni Salazar na pwedesir na magtipon nin tubig an mga konsomedores sa paagi kan 8-hour period minimum na sinda nagpapaluwas nin tubig.
