LEGAZPI CITY-Padagos an pagresponde kan Philippine Red Cross (PRC) sa mahiwasang pagbaha asin landslide sa nagkapirang lugar sa Bicol Region huli sa epekto kan Shearline.
Labing naapektaran an mga banwaan sa Catanduanes partikular na sa Hinipan, Bagamanoc, kun sain nairehisto an pagbabaha na nagaabot hasta sa iksan.
Mientrastanto hasta sa tuhod man naeksperyensyahan na tubig-baha sa Rizal (Viga), Camburo (Caramoran), asin Biong (Gigmoto).
Nakadanas man nin pagbabaha sa banwaan kan Panganiban, Pandan, Bato, Virac, asin Gogon Centro.
Nakapagrehistro man nin mga landslide na nagkawsa nin limitadong agihan sa nagkapirang parte kan Viga, San Miguel, Pandan, Caramoran, asin Panganiban.
Sa presente, padagos an pigasasagibong search and verification para sa sarong indibidwal na nairehistrong nawawara sa Obo, San Miguel.
