LEGAZPI CITY – Himas rehas an inabot kan duwang lalaki makalihis maarestar huli sa kasong homicide sa Barangay Ilawod, Legazpi City.
Segun ki Legazpi City Police Station Public Information Officer Police Executive Master Sergeant Carlos Paña sa intrevista kan Bombo Radyo Legazpi na nadakop an mga suspetsado sa bisa kan mandamiento de aresto mapadapit sa ginibo nindang krimen 35 taon na an nakaagi.
Binisto an mga suspetsado na sinda alyas “ruben”, 55 anyos, may agom asin an saiyang tugang na si alyas “vencio” 57 anyos na parehong residente kan naunambitang barangay.
Igwa man suboot na nakatalaan na pyansa an saindang kasong pigkakahampang na igwang kantidad na P20,000 para sa saindang temporamenteng libertad.
Pigtaram pa kan opisyal na pwedesir na naghali an mga suspetsado kan oras na iseserbi na an mandamiento de aresto asin nagbalik sana pirang taon an makalihis.
Pighihingoa man liwat kan mga warrant officer na magkadarkop man an mga indibidwal na nagtatago sa ley maski suboot inabot na nin pirang dekada.
Sa presente, nagtetenir sa kustodiya ng Legazpi City Police Station an mga suspetsado asin nakatalaang i-turn over sa korte para sa magkakanigong disposisyon asin commitment sa Bureau of Jail Management and Penology.
Pagirumdom ni Paña sa mga nagtatago sa ley na hampangon an saindang mga kasong pigkakahampang nganing malinig ninda an saindang pangaran sa paagi kan paghampang sa korte.
