Nagkawsa nin mahiwas na danyos an nangyaring magnitude 7.5 na linog sa Hilagang parte kan Japan kun saen 30 katawo an nairido, pagkaraot kan pirang mga tinampo, power outage, asin nagrehistro nin saradit na kasulo.
Nag-trigger man an linog nin tsunami na nag-abot sa 70 sentimetros an langkaw kun kaya napiritan an pag-ebakwar kan 28,000 na residentes.
An linog nakaapektar man sa nagkapirang imprastraktura, kabale an mga Shinkansen train services, mantang nawara an kuryente sa labing 2,700 na mga kaharongan.
Dai man naapektaran an mga haraning nuclear plant sa lugar .
Nagpatanid si Japan Prime Minister Sanae Takaichi sa publiko na maging alerto sa posibilidad nin aftershocks.
Marurumduman na an Japan, arog kan Pilipinas an parte kan “Ring of Fire,” na nakakaeksperyensya nin poco mas o menos 1,500 na linog kada taon, kun kaya preparado nang marhay an nasyon sa posibleng mga megaquakes sa maabot na panahon.
