LEGAZPI CITY — Sa karsel an bagsak kan sarong lalaking maestro makalihis an isinagibong operasyon kan mga otoridad sa Brgy. Carriedo, banwaan kan Irosin, Sorsogon.
Binisto ining si Alejandro Gamba, 40-anyos na residente man sa nasabing lugar.
Inarestar an paratukdo sa bisa kan mandamiento de aresto na ibinaba sa sala ni Hon. Judge Adolfo G. Fajardo kan RTC Branch 55 sa banwaan kan Irosin katakod kan 3-counts nin pagbayolar sa Acta Republika Numerado 7610 o an Anti-Child Abuse Law.
Kakabit man kaini an rekomendadong piyansa na P80,000.00 sa kada kasong kinakahampang.
Si Gamba man an ipigkokonsiderar na rank number 9 sa most wanted persons kan nasabing lugar.
