LEGAZPI CITY – Uminabot na sa 45 aftershocks an nairehistro kan Philippine Institute of Volcanology and Seismology (PHIVOLCS) sa palibot kan epicenter kan namatean na magnitude 6.0 na linog sa parte kan Pandan, Catanduanes.
Sa intrevista kan Bombo Radyo Legazpi kay Phivolcs Director Renato Solidum, pighayag kaini na nasa pagultangan kan magnitude 1.8 hanggang 3.3 an nasambitan na mga pagyugo alagad normal man sana ini kaya warang dapat na ikahandal an publiko.
Segun digdi, dakol pang na-locate na saradit na pagyugo an saindang mga instrumento na dae na ipiglaag sa website kan ahensya.
Dugang na eksplinasyon pa ni Solidum na moderately strong an nasambitan na pagyugo kaya uminabot ini sa nagkapirang parte kan Metro Manila alagad sa dagat man tuminama kaya dae nagkawsa nin anuman na danyos.
Pigpawi man kan opisyal an pagkahandal kan publiko na posibleng magkaigwa nin tsunami huli ta an harani sana suboot sa magnitude 7 an pwedesir na mag-trigger kaini.
