LEGAZPI CITY — Preparado an Overseas Workers Welfare Administration (OWWA) na magtaong-suporta sa mga documented Overseas Filipino Workers (OFWs) na posibleng maapektaran kan pagbusol sa ‘Saudization Policy’.
Napag-araman na obheto sa nasabing polisiya an pagboost kan employment sa mga Saudi nationals katakod kan Vision 2030 kan Kingdom of Saudi Arabia na pigpepensar na makakaapektar man sa labi sa 9 million foreign workers sa nasabing lugar kaibanan na an nagkapirang Pilipino.
Sa intrevista kan Bombo Radyo Legazpi ki OWWA Bicol spokesperson Rowena Alzaga na base sa datos kan OWWA nasa 43,921 documented OFWs an nasa Saudi sa presente kun saen aminado ining makakasabay an mga Pinoy sa posibleng ma-lay off kun en kaso.
Katakod kaini, nakalatag na man suboot an contingency plan sa livelihood projects, job referrals asin training para sa mga ini na parte kan reintegration program kan OWWA siring man an Relief Assistance Program (RAP) na sakop bako sana an displaced OFWs kundi an saindang pamilya.
Afuera pa digdi an employment opportunities sa tabang kan Department of Labor and Employment (DOLE) asin Philippine Overseas Employment Administration (POEA).
Sa presente, pighahalat pa kan ahensya an ibababang guidelines sa implementasyon kan nasabing polisiya.
Magigirumduman na enot naman na ibinusol an Saudization policy kan taong 2015 asin 2017.
