LEGAZPI CITY – (Update) Nadugangan pa an numero kan mga personalidad na paplantaran nin kaso makalihis an isinagibong entrapment operation sa luwas kan oficina kan Land Transportation, Franchising and Regulatory Board (LTFRB) sa Brgy. Rawis sa ciudad kan Legazpi.
Kinumpirmar ni PNP CIDG Albay chief PMaj. Ronnie Fabia sa intrevista kan Bombo Radyo Legazpi na lima sa mga ini an nakadesignar sa mga oficina kan LTFRB asin Land Transportation Office (LTO) mantang duwa man an sibilyan.
Binisto an mga ining sinda Narciso Montereal, John Robert Pacurib asin Eduardo Felix kan LTFRB; Winston Cahulugan asin Eutequio Bagasbas asin duwang sibilyan na sinda Mark Ryan Sumulong na nagpabistong legal consultant kan LTFRB asin Nerio Loar na nagsirbeng driver kan grupo.
Na-identificaran an mga ini sa paagi kan ipigsumiter na sinumpaang salaysay ni Loar na nag-aakong warang kinaaraman sa insidente.
Segun sa complainant na bus operator kan Maples Tourist Bus na si Apple de Guzman, pigsasambit suboot ni Sumulong na si Montereal, hefe kan Bicol Inter-Agency Road Safety Operations (BIARSO) an may kasuguan na magkuha kan P150, 000 na kantidad antes i-release an bus na pig-impound.
Pigsasabing yaon man sa lugar kan isagibo an operasyon alagad nakaibitar huli ta dae direktang nakipagtransaksyon.
Enot naman na naisunad an kasong Robbery Extortion o pagbayolar sa Article 294 kan Revised Penal Code (RPC) asin Usurpation of Authority kontra ki Sumulong mantang may dugang pang pagbalgar sa Anti-Graft and Corrupt Practices Act para sa mga government employees.
Kasuodma man isinumiter an kaso para sa mga nagtetenir na at large asin kaibanan sa grupo.
